ஒமைக்ரான் பரவல் அதிகரித்து வரும் நிலையில் தமிழக அரசு முக்கிய உத்தரவை பிறப்பித்துள்ளது.கொரோனா பரவல் நாளுக்கு நாள் குறைந்து வரும் நிலையில் ஊரடங்கில் பல்வேறு தளர்வுகள் அறிவிக்கப்பட்டன. ஆனால் உலகம் முழுவதும் தற்போது பரவிவரும் ஒமைக்ரான் வைரஸால் புதிய நெருக்கடி உருவாகியுள்ளது.

கொரோனா வைரஸை விட 70 சதவீதம் வேகமாக பரவும் தன்மை கொண்டது ஒமைக்ரான். தமிழகத்தில் ஏற்கெனவே ஒருவருக்கு ஒமைக்ரான் வைரஸ் உறுதி செய்யப்பட்டுள்ள நிலையில் கூடுதலாக 4 பேருக்கு ஒமைக்ரான் வைரஸ் தொற்று இருக்கலாம் என சந்தேகிக்கப்படுவதாக சுகாதாரத் துறை செயலாளர் ராதாகிருஷ்ணன் தெரிவித்துள்ளார். இதனால் பன்னாட்டு விமான நிலையங்களில் கட்டுப்பாடுகள் தீவிரமடைந்து வருகின்றன. 

வெளி மாநிலங்களில் இருந்து வரும் நபர்களுக்கு புதிய வழிகாட்டு நெறிமுறையை பின்பற்ற அறிவுறுத்தப்பட்டுள்ளது. வெளி மாநிலங்களில் இருந்து விமானத்தின் மூலம் தமிழகத்திற்குள் பயணிகள் வர இ பதிவு கட்டாயம் என அறிவிக்கப்பட்டுள்ளது. உள் நாட்டுக்குள்ளேயே பயணிகள் கட்டுப்பாடுகள் அதிகரிக்க தொடங்கியுள்ளது. 

பிற மாநிலங்களில் இருந்து வரும் நபர்கள் கொரோனா தடுப்பூசி போடப்பட்டிருப்பதுடன் இ பதிவு செய்து வர வேண்டும். குறிப்பாக கேரளாவில் இருந்து தமிழகத்திற்குள் வரும் நபர்கள் இரண்டு டோஸ் தடுப்பூசி கட்டாயம் செலுத்தியிருக்க வேண்டும். மேலும் கேரள மாநில மக்கள் தமிழ்நாடு வரும் போது 72 மணி நேரத்திற்கு முன்பு எடுக்கப்பட்ட கொரோனா நெகடிவ் சான்றிதழ் அவசியம் கொண்டு வர வேண்டும் என்று இந்திய விமான நிலையங்களின் ஆணையம் மாநிலம் வாரியாக வெளியிட்ட அறிவிப்பில் தெரிவிக்கப்பட்டுள்ளது.